Ukrayına aq qorçalayıcı teşkilâtları Qırımda apiske alınğan «Qırım birdemligi» vatandaş jurnalisti, yürek hastası Amet Suleymanovnı azat etmege çağıra. Bu aqta aq qorçalayıcılarnıñ beyanatında aytıla.
«Amet Suleymanov yürek klapanı deñiştirilecek ameliyatqa muhtac olğanı içün apiste öle bile. Azatlıqtan marum etüv jurnalist içün ölüm ükmü ola», – dep aytıla aq qorçalayıcınıñ beyanatında.
Olarnıñ qayd etkenlerine köre, BM işkencelerge qarşı komiteti Rusiyege muracaat etip, Amet Suleymanovğa qarşı ükümniñ yerine ketirilüvini toqtatmağa talap etti. BM umumiy tibbiy teşkerüv yapılmasını ve vatandaş jurnalistine kerekli tedaviylev kösterilüvini talap ete.
2021 senesi Rusiye mahkemesi Amet Suleymanovnı «Hizb ut-Tahrir davasına» istinaden 12 yılğa üküm etti.
Suleymanov sağlıq vaziyeti sebebinden 3 yıl ev apsinde edi. Jurnalistniñ yürekniñ arteriya ve mitral yetmemezligi bar, yürek klapanı acele deñiştirilmeli.
Bu yıl aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net/?utm_medium=otf&utm_campaign=proxy&utm_source=otf. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
