Bu aqta imayecisi Lilâ Gemeci «Qırım birdemligine» haber etti.
Mahkemede imaye tarafı tibbiy teşkerüv ve tibbiy qarar çıqarıluvı aqqında muracaatta bulunğan edi.
«Bu qarardan añlaşıla ki, bir yılda Ametniñ alı fenalaştı, hastalıqlarınıñ seviyeleri deñişti. Eki hastalığı hastalıq cedveliniñ 41-inci ve 42-nci maddesine köre ağır hastalıq sebebinden cezadan azat etüvni belgilegen hastalıqlar sayıla», – dep ayttı Gemeci.
«Gafarov-Şiring cedveli»: Rusiyede apis etilgen qırımlılarğa tibbiy yardım kösterilmey (fotoresimler)
İmaye tarafı bu tibbiy qararnı imzalağan şahıslarnı çağırıp sorğuğa çekmege rica etti. Lâkin bu muracaat qabul etilmedi.
Tibbiy-sanitar bölükniñ vekili Suleymanovnıñ hastalıq seviyesi «pek ağır degil» dep, Ametke yürek ameliyatı ne vaqıt yapılacağını aytıp olamadı. Aynı vaqıtta, Suleymanov muhtac olğan ameliyatlar Vladimirde yapılmay, dep tasdıqladı.
Mahkeme imaye tarafınıñ Suleymanovğa yapılğan bütün talillerniñ berilüvi ve saqatlıq derecesiniñ belgilenüvi aqqında muracaatını baqmadı.
«Mustaqil tibbiy ekspertlerni celp etip, olğan tibbiy vesiqalar esasında hulâsa almağa planlaştıramız ve istinam mahkemesi bizni eşitir, dep ümüt etemiz», – dedi Lilâ Gemeci.
İmayeciniñ aytqanına köre, şimdi Suleymanov kerekli tedaviylev almay. Tek qan basımını tüşürgen ilâc ala.
«Yüregi içün bir tedaviylev berilmedi, diger hastalıqları daa beter ola ve tedaviylenmey», – dedi Gemeci.
2023 senesi aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları toqtamay.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
