Moderna Amerika şirketi koronavirus aşısınıñ üçünci klinik sınav fazasında 94,5% tesiri aqqında ilân etti. Bu aqta şirket saytında aytıla.
Tedqiqatlarda 30 biñden çoq göñülli iştirak etti. İlk ara talili kösterdi ki, COVID-19 aşısınıñ ekinci dozası yapılğanından eki afta soñra tedqiqatnıñ 95 iştirakçisi hastalandı. 95 insandan 90-ı zararsız madde aldı, beşi – aşı, dep haber ete «Nastoyaşçeye Vremâ».
Tedqiqatnıñ ekinci qısmı ağır COVID-19 hastaları oldı. Tedqiq protokollarında qayd etilgenine köre, umumen 11 ağır hasta bar edi, episi platsebo gruppasından, dep aytıla şirket haberinde.
Moderna aşısınıñ adı mRNA-1273. Şirket telükesizlik ve semerelik ara malümatlarına esaslanıp, onıñ qullanmasına izin almaq içün Aş ve ilâc keyfiyetini sanitar közetüv idaresine (FDA) ariza bermege planlaştıra. Acele qullanuv ruhseti yılnıñ soñuna qadar berile bile.
Noyabrniñ 9-nda Pfizer ve BioNTech azırlağan aşılarınıñ üçünci klinik sınav fazasında 90% tesiri olğanını bildirgen ediler. Pfizer aşısınıñ sınavlarında tahminen 44 biñ göñülli iştirak ete.
Dünya sağlıq teşkilâtınıñ malümatına köre, al-azırda yüzden çoq koronavirus ilâcı yapılıp baqıla. Teşkilâtnıñ qayd etkenine köre, aşı üç klinik sınav fazasından keçmeli, üçünci fazağa farqlı memleketlerden tahminen on aşı keçti.
Rusiyede üçünci klinik sınav fazasını yapmağan eki koronavirus aşısı qayd etildi: Gamaleya Merkeziniñ Sputnik V aşısı ve «Vektor» Novosibirsk merkeziniñ «EpiVakKorona» aşısı.
Sentâbrniñ 9-nda AstraZeneca Plc farmatsevtik şirketi koronavirus aşısınıñ sınavlarını toqtattı. Bu qarar tedqiqat iştirakçilerinden biriniñ añlaşılmağan hastalığı sebebinden qabul etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
