Amerikanıñ Purdue Universitetinde «Qırımnıñ mirası: resimlerde qırımtatarlar» sergisi keçirildi, dep haber ete teşkilâtçısı Crimean Tatar Foundation USA.
John Martinson Honor Collegede keçirilgen tedbir çerçivesinde ziyaretçiler «Örnek» yapuv esnasını kördi, qırımtatar qavesini içti ve qurabiye aşadı ve Ukrayına alimleriniñ 1944 senesi qırımtatarlarnıñ Qırımdan sürgün etilüvi ve genotsid aqqında lektsiyanı diñledi.
«Asırlar devamında Qırım tarihınıñ ayırılmaz parçası olğan medeniyetniñ canlı sergisini yapmağa istedik», – dep qayd ete serginiñ reberleri Zera ve Zarema Mustafayevler, Purdue Universitetiniñ ukrayin tedqiqatçıları ve Crimean Tatar Foundation USA prezidentleri.
Sergi vaqtında «Haytarma» filmi (qırımtatar sürgünligi aqqında ilk levha) kösterildi. Teşkilâtçılar qayd etkenine köre, film halqnıñ tarihiy faciasınen bağlı bediiy tüşünce ola.
«Bediiy sergi, film kösterilüvi, akademik lektsiya ve ananeviy aşlar qırımtatar medeniyeti ve tarihına çoq taraflı yanaşuv yaptı. Bu adiy bir sergi degil, büyük bir tasil tecribesi, ziyaretçiler keçmiş ve bugün, sanat, tarih ve er künlik yaşayış arasında bağnı körmege imkân bere», – dep qayd etti Purdue Universitetiniñ felsefe professorı Steysi Konnoton.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
