Amerika istihbaratı Ukrayına ve Rusiye arasında cenk areketleri bir qaç ay devamında bayağı yavaşlaycaq, dep bekley, dep bildirdi ABD milliy istihbaratınıñ müdiri Avril Haines Kaliforniâdaki milliy mudafaa forumında.
ABD istihbaratı, Rusiye prezidenti Rusiye ordusınıñ qıyınlıqlarından «haberdar olsa da», «ne qadar qıyın olğanını yahşı añlaymı» belli degil, dep tüşüne.
«Zıddiyetniñ biraz yavaşlağanını köremiz… yaqın aylarda bunı körecekmiz, dep bekleymiz», – dep bildire Hainesniñ aytqanlarını Sky News neşiri.
O, eki ordu qış devamında yañı donatma alacaq ve baarde qarşı ücüm yapmaq içün azırlanacaq, amma «rusiyelilerniñ bunı yapmağa kerçekten azır olğanınen bağlı şübheler bar» dep, Ukrayına içün daa optimistik tahminler bar, dep qoştı.
Haines qayd etkenine köre, Rusiye tarafından Ukrayınanıñ kritik infrastrukturasınıñ yoq etilüvi Ukrayına arbiyleriniñ tirenüv iradesini bozmaq içün yapıla, amma istihbarat «şimdi maqsadlarına irişkenlerinen bağlı bir delil yoq», dep qoştı.
Aynı vaqıtta, Amerika Cenkni tedqiq etüv institutınıñ (ISW) tedqiqatçıları qış kelgeninen Ukrayına şarqındaki şaraitler arbiy operatsiyalarnıñ daa tez olması içün daa uyğun ola, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
