OSCEde AQŞ vekilleri Rusiyeni ilhaq etilgen Qırımdaki vaziyet aqqında serbest haber aqınına mania olmamağa çağırttılar. Bu vekillikniñ resmiy Twitter saifesinde bildirile.
"Qırım Ukrainanıñ ayırılmaz parçası edi ve olıp qala. AQŞ yarımadaki vaziyet aqqında serbest haber aqınına mania olmamağa çağırtta", - denile beyanatta.
Bundan ğayrı, Amerika diplomatları, Ukraina vatandaşlarına ülke içındi serbest yürmesine razılıq bermege çağırttı.
Human Rights Watch halqara uquq qoruyıcı teşkilât, ukrain jurnalistlerniñ yarımadağa barmasına yasaqları sebebinden, Rusiyeni Qırımdan kelgen malımat aqınınıñ boğmasında qabaatlay.
Yanvarniñ 18-nde Rusiye FSBsiniñ hadimleri Qırım.Aqiqat muarririyetinen işbirligi yapqan ukrainalı jurnalist Taras İbragimovnıñ Rusiyege ve onıñ işğali altındaki Qırımğa kirişini 2054 senesi mayısnıñ soñuna qadar yasaqladı.
Ukraina milliy jurnalistler birligi, ukrainalı jurnalist Taras İbragimovnıñ Rusiyege ve işğali altındaki Qırımğa kiriş yasağını «repressiv arsenalnıñ bir parçası» olaraq adlandırdı.
Ukraina prezidentiniñ Qırım Muhtar Cumhuriyetindeki temsilciligi de İbragimovnıñ Qırımğa kiriş yasağını takbih etti. Ukraina aq qorçalayıcıları ise halqara toplulıqnı işğal etilgen Qırımda jurnalist, bloger ve faallerge basqı quvetleştirilüviniñ toqtatılması içün Rusiyege qarşı basqı quvetleştirmesine çağırdı.
2014 senesi Qırım işğal etilgen soñ Rusiye quvetçileri bir qaç Ukraina jurnalistiniñ yarımadağa ve Rusiyege kirişini yasaqladı.
