ABD prezidenti Donald Trump, COVID-19 koronavirus pandemiyası sebebinden bütün ştatlarda büyük felâket beyannamesini imzaladı. İlk sefer felâket bütün Amerika Birleşken Devletlerinde ilân etile. Bu aqta Beyaz saraynıñ qararında aytıla, dep bildire Azatlıq Radiosı.
Amerika kütleviy haber vastaları ve ekspertleri Trumpnıñ COVID-19 qırğınlığını tutmaq içün yapqanlarını tenqit etken maqalelerni çoq derc etti. Jurnalistlerniñ bildirgenine köre, mütehassıslar virus tarqaluvına qarşı sert tedbir alınmasını daa qışta talap etti, amma ABD prezidenti tekliflerge razı olmadı. Daa soñra Trump Dünya sağlıq teşkilâtınıñ yapqanlarını tenqit etti. ABD prezidentiniñ fikirince, yañı çeşit virus tarqalğanda teşkilât Qıtayğa çoq diqqat ayırdı.
ABD, COVID-19 koronavirus hastalığından ölgenlerniñ sayısına köre dünyada birinci yerde buluna. Birleşken Devletlerde vefat etkenlerniñ sayısı 20 buçuq biñden çoq oldı. Eñ çoq New Yorkta vefat eteler – sekiz buçuq biñden çoq insan. Soñki malümatqa köre, ABDde yarım milliondan çoq COVID-19 hastası qayd etildi.
İtaliyada aman-aman 19 buçuq biñ kişi vefat etti. Memlekette yañı çeşit koronavirusqa oğrağan 152 biñden çoq insan qayd etildi. Ölüm sayısına köre üçünci yerde İspaniya buluna. Anda 16,5 biñ kişiden çoq vefat etti. İspaniyada hastalarnıñ sayısı 163 biñni aştı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
