İyülniñ 25-nde saba Qırımda COVID-19 koronavirus yuqunçı tarqalğanı içün 1376 insan tibbiy közetüv altında buluna, dep bildire Qırımnıñ Rusiye ükümetiniñ matbuat hızmeti.
Qayd etilgenine köre, 1376 insandan 812-si evde dinamik közetüv altında buluna, 482 kişi hastahanede, 82 insan observatorda qala.
Qırım ve Aqyardaki Rospotrebnadzor idaresiniñ malümatına köre, umumen 1077 COVID-19 hastası qayd etildi. 224 insan Qırımnıñ tibbiy müessiselerinde tedaviylene, 820 kişi tüzelip hastahaneden çıqtı.
İyülniñ 24-nde Qırımda 21 koronavirus hastası qayd etildi, dep bildirdi Rusiye kontrolindeki Qırım yolbaşçısı Sergey Aksenov.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
