Link açıqlığı

Saatnıñ esas haberi

Aman-aman üç yıl SİZOda: Rusiyedeki mahkeme Qırımdaki «Hizb ut-Tahrir davasınıñ» mabüsleriniñ apis cezasını uzattı


Bağçasaraydaki ekinci «Hizb ut-Tahrir davası» mabüsleri
Bağçasaraydaki ekinci «Hizb ut-Tahrir davası» mabüsleri

Rusiyeniñ Rostov-na-Donudaki Cenübiy okrugınıñ arbiy makhemesi Bağçasaraydaki ekinci «Hizb ut-Tahrir davası» mabüsleriniñ apiste tutuv müddetini uzattı. Olar noyabrniñ 12-ne qadar tahqiqat izolâtorında qalacaqlar, dep bildire «Qırım birdemligi» cemaat birleşmesi.

«Sıñırlav tedbiriniñ uzun müddetke uzatılması cezağa oşay. Müvekkilim Zekiryayev 13 balanıñ babası ola. Saqlanacaq dep tüşünmeysiñ. 13 balanı terbiyelemek aqqını tutıp alğanlar. Mahkeme sıñırlav tedbirini deñiştirse, imaye mabüslerniñ mahkemege kelmesini temin eter», – dep işandırmağa tırıştı qadını advokat Aleksey Ladin.

Diger imayeciler qırımlılar içün başqa sıñırlav tedbiriniñ saylanmasını istedi, amma mahkeme advokatlarnıñ delillerine qulaq asmadı.

Dava mabüsleri SİZOda aman-aman üç yıl buluna.

2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.

«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.

2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG