«Aluşta» din cemiyetiniñ sabıq azası, 59 yaşında qırımlı Ruslan Mesutov Yakutsk civarında Tabagi qasabasındaki hastahaneden planlaştırılğan 21 kün yerine bir aftadan soñ kamera şekilli yerge avuştırıldı. Bu aqta «Qırım birdemligi» cemaat birleşmesi qız qardaşı Suvade Mesutovanıñ malümatına esaslanıp, Facebook saifesinde bildirdi.
Berilgen malümatqa köre, mektüpte Mesutov qız qardaşına hastahanede «bir ilâc bermediler», dep tarif etti. Martnıñ 11-nde onı yürek ağrısı sebebinden hastahanege alğan ediler, çünki esini coyğan edi. Şimdi arterial gipertenziya, hronik C gepatiti (apishanede belli oldı) ve omurğa ağrıları bar.
2024 senesi noyabr ayında erkek Yakutsktaki İK-1-ge etap etilgen soñ onı ceza izolâtorından aman-aman çıqarmadılar.
Bu yıl yanvar ayında uquqçı Nazim Şeyhmambetov mabüsni ceza izolâtorına avuştıruv qararını şikâyet etti. O, Ruslan Mesutovnı evine yaqın koloniyağa avuştırmaq talabınen mahkemege dava açtırdı.
Ruslan Mesutovnıñ soy-sopları bildirgenine köre, olar Yakutsktaki İK-1-ge kerekli ilâclar yollamağa tırışqan ediler, amma kimse poçtadan almadı – keri qaytqan ediler. Al-azırda Mesutov onı başqa apishanege avuştıracaqlar dep başqa bir şey yollamamağa rica ete.
«Onı cinayetçi olaraq tanıdılar. Er bir bozuv içün qoşma ceza bereler. Er ay qan ala ediler, talil neticelerini köstermege rica etse, bir şey bermey ve daa 15 kün ceza izolâtorına qoşa ediler», – dep tarif etti Suvade Mesutova.
2019 senesi iyünniñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen «Hizb ut-Tahrir» islâm siyasiy firqasınen alâqaları bar dep qabaatladı.
2021 senesi avgustnıñ 16-nda Cenübiy okrugınıñ arbiy mahkemesi «Aluştadaki Hizb ut-Tahrir gruppasınıñ» mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
