Tintüv haberleri saba saat 6:20-de keldi. Şimdi Gafarovnıñ evinde beş çağına yetmegen bala bar.
Avgust ayında Gafarovğa Rusiye Federatsiyasınıñ Memuriy uquq bozuvları kodeksiniñ 20.2.2 maddesine istinaden (Cemaat yerlerinde vatandaşlarnıñ kütleviy şekilde bulunması ve (ya da) areket etmesini teşkil etip, cemaat nizamını bozuv) memuriy apis cezası berilgen edi. O, dört kün tahqiqat izolâtorında tutuldı. Gafarov Aqmescitteki Rusiye Kiyev rayon mahkemesine açıq oturışuvğa kelgen edi.
«Ekstremizm ile küreş merkeziniñ» hadimleri Abdul Gafarovnı Aluştadaki Rusiye polis bölügine alıp ketken eken.
Gafarovnıñ ömür arqadaşı tintüv tafsilâtlarını aydınlattı. «Saba saat 6:30-larda qapumıznı qaqıp, açmağa talap etkenler. Uyanıp ne olğanını añlamağa başlağanda aqayım kiyiniñiz dedi, qapu daa çoq qaqılğan edi. Aqayım qıçıra: «Bekleñiz, apayım kiyine!». Soñra aşağı ketti. Balalarımıznı uyandırıp, «kiyiniñiz dedi», – dep ayttı o.
Fatma Gafarovanıñ aytqanına köre, soñra 6-7 maskalı adam ve eki şaat kirdi.
«Aşağıda oña (Abdul Gafarovğa – QA) protokol oqup başladılar. Ağlağan balamnen yanlarına barıp ne olğanını sorasam, maña «Aqayıñızğa añlattıq» dediler. Men deyim: «Maña aytıñız». Cevap bereler: «Mecbur degilmiz, aqayıñızğa ayttıq». Soñra aytam: «Adıñıznı aytıñız». Oqup turğan hadim bir şey aytmadı, ekincisi ise «Şambazov – «Ekstremizm ile küreş merkezi» dep ayttı», – dep qayd etti Gafarovnıñ ömür arqadaşı.
O, uquq qoruyıcılar tintüv sebeplerini aytmağa razı olmadı, dep qoştı. «Soñra bala yuqlağan odağan kirip, ışıq yaqqanlar. «Eki balam bar, bir danesi quçağımda, ekincisi daa yuqlay» desem. «Yavaştan çıqarıñız» dey. Balanı aldıq ve odalarnı dolaşıp başladılar. Tintüv keçirip, birden sorağanlar: «Yasaqlanğan edebiyat, silâ ve ilâhre barmı». Foto ve video çıqarmağa yasaq olğanını da aytqanlar», – dedi Fatma Gafarova.
«Qırım birdemligi» qayd etkenine köre, din cemiyeti ilk sefer basqığa oğramay. 2020 senesi iyün ayında imam Aşirovğa «qanunsız missioner faaliyeti» içün 5 biñ ruble para cezası berilgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
