Link açıqlığı

Saatnıñ esas haberi

Qırımda Aluştadaki «Hizb ut-Tahrir davasınıñ» mabüslerine online qoltutuv flashmobını ötkereler (+foto)


Faal Aluştadaki «Hizb ut-Tahrir davasınıñ» mabüsleri fotoresimini tuta
Faal Aluştadaki «Hizb ut-Tahrir davasınıñ» mabüsleri fotoresimini tuta

Qırımda avgustnıñ 16-nda Rostov-na-Donu (Rusiye) Cenübiy okrugınıñ arbiy mahkemesinde ükmü çıqarılacaq Aluştadaki «Hizb ut-Tahrir davası» mabüslerine online qoltutuv flashmobı başladı.

Bu aqta «Qırım birdemligi» cemaat birleşmesi haber ete.

Faaller, mabüslerniñ soy-sop ve dostları içtimaiy ağlardaki saifelerinde «İman sebebinden 66 yıl apis» yazısı ile fotoresimler paylaşa.

Faaller Aluştadaki «Hizb ut-Tahrir davası» mabüsleriniñ fotoresimini tuta
Faaller Aluştadaki «Hizb ut-Tahrir davası» mabüsleriniñ fotoresimini tuta

Daa evel haber etilgenine köre, Rostov-na-Donu Cenübiy okrugınıñ arbiy mahkemesinde Aluştadaki «Hizb ut-Tahrir davasınıñ» soñki diñlevi olıp keçti. Onıñ mabüsleri «Qırımda terror teşkilâtını teşkil etkeninde ve anda iştirak etkeninde» qabaatlana. Bu davanıñ ükmü bazarertesi künü, avgustnıñ 16-nda, saat 9:30-de çıqarılacaqtır.

Faaller Aluştadaki «Hizb ut-Tahrir davası» mabüsleriniñ fotoresimlerini tuta
Faaller Aluştadaki «Hizb ut-Tahrir davası» mabüsleriniñ fotoresimlerini tuta

Rusiye quvetçileri qırımlılarnı 2019 senesi iyünniñ 10-nda keçirgen tintüvlerden soñ tuttı. Rusiye FSBsi, tahqiqat tedbirleri 205.5 maddesine istinaden (terror teşkilâtınıñ faaliyetini teşkil etüv ya da iştirak etüv) çerçivesinde keçirile ve «Hizb ut-Tahrir» teşkilâtınen bağlı. Ruslan Nagayev ve Eldar Kantimirov Aluştada, Ruslan Mesutov Büyük Lambatta (Malıy Mayak), «Aluşta» yerli din cemiyetiniñ yolbaşçısı Lenur Halilov Körbek (İzobilnoye) köyünde tutuldı.

Dava mabüsleri al-azırda Rostov-na-Donu şeeriniñ №1 tahqiqat izolâtorında buluna, cinaiy dava ise mahkeme tahqiqatında qala.

«Memorial» aq qorçalayıcı merkezi Aluştadaki «Hizb ut-Tahrir davasınıñ» dört mabüsini siyasiy mabüs dep tanıdı.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

Qırımdaki «Hizb ut-Tahrir davaları»

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG