Rusiyeniñ Moskva vilâyetindeki Vlasiha şeer okrugınıñ istinaf arbiy mahkemesi Aluştadaki «Hizb ut-Tahrir davasınıñ» mabüsleri Lenur Halilov, Ruslan Mesutov ve Eldar Kantimirovnıñ azatlıqtan marum etüv ile bağlı olmağan sıñırlav tedbirini belgilemege razı olmadı.
Bu aqta «Qırım birdemligi» birleşmesi Qırım.Aqiqatqa bildirdi.
«Şahsiyetni tesbit etüv vaqtında Ruslan Mesutov rus tilinde mahkeme suallerine cevap bermege razı olmadı. Mahkeme dava rus tilinde kete, dep ayttı. Mesutov qırımtatarca laf etmege devam ete. Mahkeme yardımcı vastasınen şahsiyetini tesbit etip, Siyar Paniçten fikrini ve añlaşma tizildimi dep soradı. Aynısı Eldar Kantimirov ve Lenur Halilov ve imayecileri Rifat Yunus ve Ayder Azamatov ile oldı. Ruslan Nagayev istinaf şikâyetini bermegeni içün mahkemege kelmedi», – dep bildirdi birleşme.
Advokatlar mabüsler rusça yaramay bile dep, terciman bermege rica etti, ve muracaat qabul etilse, em qabaatlayıcı, em imaye tarafınıñ işi qolaylaşır edi. Mahkeme terciman bermege razı olmadı ve birinci qurulış qararını deñiştirmedi.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Rusiyedeki mahkeme 2021 senesi yanvarniñ 12-nde dava mabüslerini sert rejimli koloniyada qalmasına üküm etti. Ayder Cepparov 17 yılğa üküm etildi. O, qabaatını tanımadı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
