Arman ayınıñ 22-nde Aluştada Rusiye quvetçileri "terrorizmge qarşı planlaştırılğan tedbirlerni" keçire, bunıñ içün Vinogradnaya soqağında araba areketi toqtatılğan. Bu aqta şeerniñ Rusiye kontrolindeki memuriyeti haber etti.
Anda "ealini haberdar etüv ve talim tahliye etüv" aqqında da aytılğan. Aynı zamanda Rusiye akimiyeti yerli sakinlerge Rusiye quvetçileriniñ areketlerini videoğa çıqarmaqnı yasaq etti. Rusiye quvetçileriniñ talimleri ne qadar vaqıt alacaq belli degil.
Bundan evel bu kibi talimler arman ayınıñ başında Aqmescitte keçirilgen edi.
Bundan evel Qırımtatar resurs merkezi, 2025 senesiniñ birinci yarısında Rusiye arbiyleri eñ azından 45 talim keçirgenini bildirgen edi. 2024 senesiniñ aynı devirinde 68 talim edi, 2023 — 10, 2022 — 20.
QRM qayd ete ki, 2025 senesinde keçken senege baqqanda talimlerniñ umumiy miqdarı az olsa da, böyle büyük arbiy faallik yarımadanıñ muntazam arbiyleştirilüvini köstere.