RF nezareti astında olğan Aluşta şeer mahkemesi noyabrniñ 23-nde saba tintüvden soñ yaqalanğan üç qırımtatardan biri Vilen Useinovğa 10 kün apis cezasını tayin etti. Bunı "Qırım birdemligi" cemaat birleşmesi haber ete.
Mahkeme "VKontakte" içtimaiy ağında 2013 senesi paylaşqan yazını RF İdariy uquq bozma qanunnamesiniñ 20.3.1 maddesiniñ (nefret ya da duşmanlıq qozğalavı) bozuluvı kibi qıymetlendirdi. Paylaşqan resimde beyaz bayraq üstünde qara tüste arap tilinde "Lâ İlâha İllâllah Muhammad-ur-Rasulüllah" dep yazılğan.
Vilen ile beraber yaqalanğan Zinur Appazov ve Yusuf Aşirovğa üküm daa yaıqarılmağan. Mahkeme oturışına diñleyicelr ve soy-sopnı yibermegenler. Bina yanında toplanğanlarğa ketmeseler tevqif etileceklerini aytqanlar.
Noyabrniñ 23-nde Rusiye quvetçileri Qırımda tintüv keçirgen soñ "Aluşta" musulman din cemiyetiniñ azalarını yaqaladı. Söz imam Yusuf Aşirov ve cemiyetniñ eki azası Vilen Useinov ve Zinur Appazov aqqındadır. Olarnıñ episi Şuma köyünde yaşay.
"Qırım birdemligi"niñ qayd etkeni kibi, din cemiyeti basqılarğa oğratılğanı artıq ilk sefer degil. 2020 senesi imam Aşirov "qanunsız missionerlik faaliyeti" içün 5 biñ ruble para cezasına mahküm etilgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
