"Aluşta" din cemiyetiniñ imamı Yusuf Aşirov eki künlük idariy tevqiften soñ azat etildi, dep haber ete "Qırım birdemligi" cemaat birleşmesi.
"Bunıñ sebebi elbette faaliyetimdir. Men İslâm dini ile oğraşam, adamlarğa onı ögretem. Qırımdaki halqımız öz kimligini, dinini coymağanını isteyim. Halqımıznen birmiz. Esas tayançımız elbette Allah ve halqımızdır", - dep ayttı Aşirov.
Tevqifler ve taqipler onıñ kelecek faaliyetine tesir etmeycegini qayd etti.
"Tünevin cuma namazı vaqtında bu camige "E" merkeziniñ hadimleri kelgeni ve namaz silâ altında qılınğanı bizge bellidir. Birisi hutbe oquğan taqdirde andan alıp ketermiz dep tehdit etkenler. Bu sebepten hutbeni yerili din cemiyetiniñ imamı degil de, muftimiz yollağan imam keçirdi", - dep ayttı advokat Rustem Kâmilev.
Noyabrniñ 23-nde Rusiye quvetçileri Qırımda tintüv keçirgen soñ "Aluşta" musulman din cemiyetiniñ azalarını yaqaladı. Söz imam Yusuf Aşirov ve cemiyetniñ eki azası Vilen Useinov ve Zinur Appazov aqqındadır. Olarnıñ episi Şuma köyünde yaşay.
"Qırım birdemligi"niñ qayd etkeni kibi, din cemiyeti basqılarğa oğratılğanı artıq ilk sefer degil. 2020 senesi imam Aşirov "qanunsız missionerlik faaliyeti" içün 5 biñ ruble para cezasına mahküm etilgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
