Alupkada çoq qatlı ev qurucılığı yerinde peyda olğan yer yılışması yol içün telükeli ola. Bu aqta Qırımnıñ Rusiye qurucılıq ve mimarcılıq naziri Mihail Hramov bildirdi.
«Ev qurulğanda yeraltı çoqraqlar açıldı…, irmaq, belki, küçük bir özen, çünki anda tam bir bataqlıq oldı. Körgenim kibi, bu yer yılışması üzerindeki yol içün büyük telüke bar. Mektep içün büyük bir telüke olğanını körmedim. Nasıl olsa da, memuriyetke tehnik vaziyetni teşkermege tevsiye etecekmiz. Cumaertesi künü Alupkanı dolaşıp çıqtım. İş çoq, er yer çatlaq tolu. Körüne, bu yerde topraq pek areketli», – dep yaza memurnıñ aytqanlarını «Krıminform».
Onıñ bildirgenine köre, Qırımnıñ yer yılışması ile küreş idaresiniñ mütehassısları qurucılıq yerini ve yanındaki mektepni teşkerdi. Aftanıñ soñuna qadar neticeleri azır olacaq. Onı Yalta memuriyetine yollaycaqlar, anda ise kerekli tedbirler alınacaq.
Hramovnıñ bildirgenine köre, ilk malümatqa köre, qurucılıq vaqtında yeraltı çoqraqlar bozuldı, «topraq sılandı, qurulğan çoq qatlı evniñ temelini suv bastı».
Yaltadaki Lomonosov aralığında yanvarniñ 11-nde saba sel neticesinde tayanğıç divarı yıqılıp, mesken evniñ kirişini blok etti. Şeerniñ Rusiye akimiyeti zarar körgen qorantağa vaqtınca ev berdi, dep bildirdi. Daa soñra Yaltanıñ Rusiye yolbaşçısı Aleksey Çelpanov, Yaltadaki Lomonosov aralığında yer yılışmaları devam ete, dep qayd etti.
