Aluştadaki «Hizb ut-Tahrir davasınıñ» mabüsleri Ruslan Mesutov, Lenur Halilov, Ruslan Nagayev, Eldar Kantimirov ve Asan Yanikov statsionar mahkeme-psihiatrik ekspertizasında bulunalar, dep bildirdi advokat İslâm Velilâyev «Qırım birdemligine».
Advokatnıñ aytqanına köre, sentâbrniñ 20-nde o, müvekkili Lenur Nagayevni №1 Qırım cumhuriyeti klinik psihiatrik hastahanesinde ziyaret etti.
«Alı bir qarar. Faqat bunı mecburiy tedbir olaraq saya ve statsionarda berilgen er angi ilâc almaqnı red ete. O, özüni psihiatrik ceetten sağlam dep saya, baş yaraları olmadı ve narkolog ya da psihiatrge baqtırılmağan edi. Anda 2019 senesi oktâbrniñ 12-13-ne qadar qalması tahmin etile», – dedi advokat.
Velilâyevniñ aytqanına köre, müvekkili ambulatoriyada şaatlıq etmekten vazgeçkeni içün statsionarğa avuştırıldı.
«Şu sebepten tahqiqatçılar cezalarınıñ müddetlerini baqıp, olarnıñ fikirince, insannıñ aqlı yerinde olğanını bilmeli ve mesüliyetke çekile bilecegine dair malümat almalı. Bunıñ içün psihiatrik hastahanege avuştırğanlar, onı gece-kündüz közeteler», – dedi advokat.
Rusiye tahqiqatınıñ dava mabüslerini mahkeme-psihiatrik ekspertizasına yollağanlarına dair izaatları yoq.
Kreml kontrolindeki Aqmescitniñ Kyiv rayon mahkemesi avgustnıñ 1-nde iyünniñ 10-nda tutulğan Aluştadaki «Hizb ut-Tahrir davasınıñ» mabüsleriniñ apis müddetlerini uzattı. Ruslan Mesutov, Ruslan Nagayev, Eldar Kantimirov ve Lenur Halilov noyabrniñ 5-ne qadar apiste qalacaq.
Rusiye quvetçileri qırımlılarnı iyünniñ 10-nda keçirilgen tintüvlerden soñ tuttı.
Rusiye FSBsi tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) aıçlğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
