Aluştadaki «Hizb ut-Tahrir davasınıñ» mabüsleri Lenur Halilov, Eldar Kantimirov ve Ruslan Nagayev SİZO-1-den Rusiyeniñ Rostov-na-Donudaki SİZO-5-ke avuştırıldı, şunıñ içün fevralniñ 1-ne belgilengen mahkeme oturışuvı Cenübiy okrugınıñ arbiy mahkemesinde olmadı. Bu aqta «Qırım birdemligi» cemaat birleşmesi advokat Emil Kurbedinovnıñ aytqanlarına esaslanıp bildire.
«Bugün mahkeme olmadı. Reis qadınıñ aytqanına köre, tahqiqat izolâtorına ariza berildi. Amma müvekkillerimizniñ başqa SİZOğa avuştırılğanı aqqında belli oldı. Hususan, Halilov, Nagayev ve Kantimirov SİZO-5-ne avuştırıldı, (Ruslan – QA) Mesutov ise SİZO-1-de qaldı. Mahkeme yañı muracaat berip yetiştiremedi, şunıñ içün mahkeme oturışuvı fevralniñ 9-ı, 10-u ve 11-ne belgilendi», – dedi imayeci.
Nevbetteki mahkeme oturışuvlarında qabaatlav tarafı delillerini bermege devam etecek, Rusiye FSBsi tarafından gizli yapılğan ses qaydları diñletilecek, dep qoştı advokat.
Rusiye penitentsiar hızmeti mezkür dava mabüsleriniñ başqa yerge avuştırılğanı aqqında resmiy malümat bermey.
Aluştadaki «Hizb ut-Tahrir davasınıñ» mahkeme esnasında qadınıñ hastalığı sebebinden uzun teneffüs ilân etildi. Dava 2020 senesi dekabrniñ 22-nde yañıdan baqılıp başladı.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
