Aluştadaki «Hizb ut-Tahrir davasınıñ» mabüsi Ruslan Mesutov SİZOda ayaq hastalığı sebebinden zornen yüre, dep bildirdi Rusiye izolâtorına barğan advokat Siyar Paniç «Qırım birdemligi» cemaat birleşmesine.
Bu sene mayısında Cezalarnı yerine ketirüv federal hızmeti onı ve Aluştadaki «Hizb ut-Tahrir davasınıñ» qalğan mabüslerini Rostov-na-Donudaki SİZO-1-ge konvoylıq etti.
«Sağlıq problemleri bar, ayağı şişti. SİZO feldşeri ve eki kere çağırılğan cerrah tarafından baqıldı, dedi. Birinci sefer baqılıp tevsiyeler berildi, ekinci kere kontrol oldı. Eki kere rentgen yapıldı, amma ayaq şişmesiniñ sebebini öyle de aytmadılar. Sınğanını inkâr eteler», – dep ayttı imayeci.
Ekim baqqan soñ, Mesutov yanğı ile küreş ine, antibiotik, ağrı kesici aldı. Şimdi müsbet deñişmeler bar – şişik ketti, amma o, topallay ve zornen yüre.
«Ayaq problemleri sebebinden Ruslan er künlik kezintige çıqıp olamay, çünki dördünci qatta buluna. Çıqması zor olmasın dep, SİZO yolbaşçısı muavininden onı birinci qatqa almağa rica ettim», – dep qoştı Paniç.
Mesutovnıñ qorantası sağlıq vaziyeti sebebinden Rostov vilâyetiniñ cemaat közetüv komissiyasına ariza bergen edi.
Aluştadaki «Hizb ut-Tahrir davasınıñ» mahkeme esnasında qadı hastalanğanı içün uzun teneffüs ilân etildi. Soñki oturışuv oktâbrniñ 21-nde oldı, eñ yaqını ise dekabrniñ 22-ne belgilendi.
Ruslan Mesutov 2020 senesi iyünniñ 10-nda Aluştanıñ Büyük Lambat (Malıy Mayak) köyünde tutuldı. Onen beraber daa üç qırımtatarı tutuldı. Mesutov Rusiye Ceza kodeksiniñ 205.5 maddesiniñ 1-inci qısmı («Terror teşkilâtınıñ faaliyetini teşkil etüv») ve Rusiye Ceza kodeksiniñ 278-inci maddesi ve 30-ıncı maddesiniñ 1-inci qısmına istinaden («Evelden añlaşqan insan gruppasınıñ akimiyetni küçnen zapt etüv azırlığı») qabaatlana.
«Memorial» aq qorçalayıcı merkezi Aluştadaki «Hizb ut-Tahrir davasınıñ» mabüslerini siyasiy mabüs dep tanıdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
