Link açıqlığı

Saatnıñ esas haberi

Aluştadaki «Hizb ut-Tahrir davasınıñ» mabüsi Nagayev kartserge qapatıldı – advokat


Advokat Ayder Azamatov
Advokat Ayder Azamatov

Aluştadaki «Hizb ut-Tahrir davasınıñ» mabüsi Ruslan Nagayev Rusiyeniñ Rostov-na-Donu tahqiqat izolâtorınıñ kartserine yerleştirildi. Bu aqta advokat Ayder Azamatov «Qırım birdemligi» fallerine bildirdi.

«Kündüz kamerada yorğannen örtüldi, çünki pek suvuq edi ve bu şekilde qızmağa mecbur edi. Bu kartserge yollanılması içün sebep oldı. Eminim, müvekkillerimizniñ ruhı küçlü ve bunıñ kibi işkenceler, men bunı işkence dep sayam, teslim olmaları içün sebep olmaz. Aqlarını qorçalamaq içün barışıq küreşini devam ettirecekler», – dep izaatladı advokat Azamatov.

İmayeciniñ fikirince, «Hizb ut-Tahrir davası» boyunca qabaatlanğanlarnı mahsus blok ve kartserlerge aselet qapatıp basqı yapalar.

Advokat Emil Kurbedinov Aqmescitteki «Hizb ut-Tahrir davası» boyunca mahküm etilgen Teymur Abdullayev ve Emil Cemadenov eki aydan berli Rusiyeniñ Salavat şeerindeki koloniyalarnıñ ceza izolâtorlarında tutula, dep bildirgen edi.

Daa evel berilgen malümatqa köre, Aluştadaki «Hizb ut-Tahrir davasınıñ» mabüsleri 2020 senesi oktâbr ayına qadar apiste qaldırıldı.

Rusiye quvetçileri 2019 senesi iyünniñ 10-nda tintüv keçirip, qırımlılarnı tutqan edi. Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG