Link açıqlığı

Saatnıñ esas haberi

Aluştadaki «Hizb ut-Tahrir davası»: ses qaydlarınıñ ekspertizası mabüslerniñ zorbalıqqa çağırğanını tapmadı


Rusiyedeki Cenübiy okrugınıñ arbiy mahkemesi oktâbrniñ 21-nde olğan oturışuvda qabaatlav tarafınıñ tilşınaslıq ve ses ekspertizasınıñ neticelerini diñledi. Prokurornıñ malümatına köre, tedqiqatta milletlerara qavğa ve zorbalıq çağıruvlarınıñ alâmetleri qayd etilmedi.

Bu aqta «Qırım birdemligi» haber ete.

Qabaatlavnıñ dinşınası mabüslerniñ «Rusiyede yasaqlanğan Hizb ut-Tahrir teşkilâtı» ile alâqaları bar, dep bildire.

Berilgen malümatqa köre, davanıñ nevbetteki oturışuvı oktâbrniñ 29-nda saba 10-da olacaq, qabaatlav «Bekirov» tahallüsli gizli şaatnıñ sorğuğa çekilmesi aqqında muracaat bergen edi.

Hatırlatamız, Rusiyeniñ Cenübiy okrugınıñ arbiy mahkemesi oktâbrniñ 13-nde Aluştadaki «Hizb ut-Tahrir davasınıñ» mabüsleri Ruslan Nagayev, Ruslan Mesutov, Eldar Kantimirov ve Lenur Halilovnı apiste tutuv müddetini 2021 senesi yanvarniñ 21-ne qadar uzattı.

Rusiye quvetçileri qırımlılarnı 2019 senesi iyünniñ 10-nda keçirgen tintüvlerden soñ tuttı. Rusiye FSBsi, tahqiqat tedbirleri 205.5 maddesine istinaden (terror teşkilâtınıñ faaliyetini teşkil etüv ya da iştirak etüv) çerçivesinde keçirile ve «Hizb ut-Tahrir» teşkilâtınen bağlı. «Qırım birdemligi» birleşmesi bildirgenine köre, Ruslan Nagayev ve Eldar Kantimirov Aluştada, Ruslan Mesutov Büyük Lambatta (Malıy Mayak), «Aluşta» yerli din cemiyetiniñ yolbaşçısı Lenur Halilov Körbek (İzobilnoye) köyünde tutuldı.

Dava mabüsleri al-azırda Rostov-na-Donu şeeriniñ №1 tahqiqat izolâtorında buluna, cinaiy dava ise mahkeme tahqiqatında qala.

«Memorial» Aluştadaki «Hizb ut-Tahrir davasınıñ» dört mabüsini siyasiy mabüs dep tanıdı.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG