Martnıñ 30-nda, salı künü, Aluştadaki Yuqarı Camige Qırım müftiyatı, FSB, Ekstremizimge qarşı merkezniñ ve prokuraturanıñ hadimleri kelgen. Bunı yerli sakinler advokat Rustem Kâmilevge haber ettiler, dep bildire «Qırım birdemligi».
«Qanun qoruyıcı organlarnıñ hadimleri azbarnı ve cami binası etrafında dolana, çekimler yapa. Bazıları öz telefonlarına», – dep yazıla bildirmede.
Aq-uquq qoruyıcılarnıñ malümatına köre, qanun qoruyıcı organlarnıñ hadimleri 3 kitapnı tutıp alğanlar: müellif Gülnara Nurullinniñ «Biznesniñ islâm etikası», rus din erbabı Şamil Alâutdinovnıñ «Qoranta. İslâm» ve «O ve o».
Cami cemaatına, ««Aluşta» Din cemiyeti» yerli teşkilâtınıñ «vicdan azatlığı ve diniy birleşmeler aqqında, ekstremistik faaliyetke ve terrorcılıqqa qarşı turuv aqqında ve diger federal qanunlarına riayet etilmesi» teşkerilgenini aytqanlar, dep bildire «Qırım birdemligi».
Bundan ğayrı, Ruslan Emirveliyevge martnıñ 29-ı aprelniñ 2-si arasında Aluşta prokuraturasına kelmek talabınen celpname bergenler. O, teşkerüv ile bağlı belli allarnı añlatmaq kerek eken.
«Qırım birdemligi»niñ bildirgenine köre, camige kelgen cemaat, FSB hadimi Alekesandr Kompaneytsevni tanığanlar. O qırımtatarlarğa qarşı bir çoq cinayet davada qabaatlav tarafında şaatlıq etken edi.
Martnıñ 2-sinde Rusiye kontrolindeki Aqmescitniñ Mirovoy mahkemesi aqmescitli imam Rasim Dervişevni «qanunsız missionerlik faaliyetinde» qabaatlap, 5 biñ ruble para cezasını berdi. Advokatı Ayder Azamatovnıñ fikirince, bu «tam siyasiy dava» ola.
Avgust 14-ünde, Rusiye nezaretindeki Aluşta şeer mahkemesi advokat Rustem Kâmilevniñ ve imam Yusuf Aşirovnıñ apellâtsiya şikâyetini baqmadan terk etti.
