Aluşta yanında kater, qail olunğan mıntaqa sıñırlarından çıqqan yaldavcığa uruldı. Rusiye İİN-niñ Qırim idaresi bildirgenine köre, adise neticesinde aqaynıñ baldırı kesildi.
"Yalıdan 120 metr mesafede 27 yaşındaki Aluşta sakini aydağan yüksek süratlı eki motorlı "Redlan" kateri, yaldağan aqayğa uruldı. Yaralanğan adamnısuvdan çıqardılar ve eñ yaqın hastahenege alıp kettiler. Ekimler, sol ayağınıñ baldırınıñ travmatik amputatsiyası oldı, dep bildirdi", - dep yaza müessise beyanatından "Krıminform".
Yalınıñ bu qısmında qail olunğan yaldav mıntaqası - yalıdan 35 metr mesafe, dep qayd etile.
"Yaldav içün yasaqlanğan mıntaqağa ketip, aqay gemi yoluna tüşti ve yüksek tezlikte ketken katerniñ aydavcısına körünmey edi. Bundan ğayrı, qazağa oğrağan aqay, böyle allarda talap etilgeni kibi özüni belgilemedi, yanında parlaq buyok yoq edi", - dep qoştılar matbuat hızmetinde.
Umumen, Rusiye FVN-niñ Qırım idaresiniñ malümatına köre, yılnın başından berli 25 suv qazası oldı, 14 adam elâk oldı.
