Kreml nezaretindeki Aqmescitniñ Kiyev rayon mahkemesi, avgustnıñ 1-inde "Hizb ut-Tahrir davası"nıñ Aluşta taqımı iştirakçileriniñ apis müddetini uzattı. Ruslan Mesutov, Ruslan Nagayev, Eldar Kantemirov ve Lenur Halilov noyabr 5-ine qadar tevqif astında tutulacaq. Mahkeme oturışı açıq şekilde keçirildi. Bu aqta Facebook saifesinde "Qırım birdemligi" cemiyet birleşmesi yazdı.
"Advokatlar ve qabaatlanğanlar bu qararnı qanunsız saya", - denile beyanatta.
Aluştada Ruslan Nagayev ve Eldar Kantemirov, Büyük Lambat (Malıy Mayak) köyünde Ruslan Mesutov, Körbek (İzobilnoye) köyünde Lenur Halilov, yerli din cemiyetiniñ reisi tutuldı.
Halilov Aluştadaki «Hizb ut-Tahrir» bölügini qurğanında (Rusiye Ceza kodeksiniñ 205.5 maddesiniñ 1-inci qısmı) qabaatlana. Tahqiqatnıñ malümatına köre, bu bölükke Kantemirov ve Nagayev kire.
Keççe Kreml nezaretindeki Aqmescitniñ Kiyev rayon mahkemesi, iyün 10-unda tutılıp alınğanlarnıñ episi - Ruslan Nagayev, Eldar Kantemirov, Ruslan Mesutov, Lenur Halilov, Riza Ömerova, Enver Ömerov, Ayder Cepparov ve Eskender Süleymanovniñ - apis müddetini avgustnıñ 5-ine qadar uzattı.
Ukraina Tış İşler Nazirligi, Qırımdaki tevqifler içün, Rusiyege siyasiy, iqtisadiy ve sanktsiya basqısını arttırmağa davet etti.
