Aluşta Rusiye memuriyetiniñ yolbaşçısı Galina Ogneva Degirmenköy (Zaprudnoye) köyünde sağanaqlar evni bastı ve yolnıñ bir qısmını yoq etti, dep bildirdi.
«Eñ müimi – kimse yaralanmadı. Şkolnaya soqağındaki evde odalarda suv yoq, mülk qısmen zarar kördi. Ozernaya soqağındaki evlerge ketken yoldan keçmek mümkün, naqliyat keçmesi içün temizleycekmiz», – dep haber etti Ogneva.
Qırımnıñ Rusiye fevqulâde vaziyetler nazirligi idaresi bildirgenine köre, 2021 senesi iyünniñ 16-ndan 18-ne qadar küçlü yağanaqlar neticesinde 426 azbar, 356 ev, 18 içtimaiy ceetten müim obyektni suv bastı. İyünniñ 22-nde saba, Qırım qurtarıcılarınıñ malümatına köre, Yalta ve Yedi Quyu rayonında 37 ev suvda qala. Umumen suv basqan yerlerden 1783 insan tahliye etildi.
Akimiyet Qırımnıñ yedek fondundan 161 mln 160 biñ ruble yarımadadaki fevqulâde vaziyet aqibetlerini yoq etmek içün sarf etmege qarar berdi.
Rusiye prezidenti Vladimir Putin Qırımğa afat aqibetlerini yoq etmek içün «acele ve büyük» yardım köstermege emir etti.
İyünniñ 22-nde Qırımda bazı yerlerde pek küçlü yağmur, boranlı yağmur, burçaq yağması beklenile, yel süratı saniyede 15-20 metr esecek.
