Aluştanı suvnen temin etken Körbekül suv anbarınıñ kölemi yanvarnıñ 26 itibarınen 2 million 640 biñ metr kub suv teşkil ete. Aynı zamanda suv kelmesi künde tahminen 10 biñ metr kub, masrafı ise 20 biñ metr kub. Bunı toplaşuv vaqtında “Voda Krım” Aluşta filialınıñ müdir vazivesini vaqıtnca icra etken Tamara Panina haber etti.
“Aluştanıñ 11 meskün yeri suvnı cevdel boyunca ala. İşhaneniñ işine kirişüv faktları qayd etilgen. Nijnâya Kutuzovka köyünde abonetler tarafından mandalnıñ izinsiz qullanuvı sebebinden 100 kub suv aqıp ketti. Yarım ay içinde daa diger yerde 200 kub metr aqıp ketti”, – Aluşta memuriyetiniñ başı Galina Ognevanıñ Facebook saifesinde yazıla.
Berilgen malümatqa köre, yaqın vaqıtta Partenit qasabasındaki çoq qatlı evniñ yuqarı qatlarında yaşağan sakinleriniñ suv ala bilmesi içün tulumba alınması planlaştırıla.
Küçük Özen köyünde ise bu sene suv-kanalizatsiya sistemalarnıñ ve arıtuv inşaatlarınıñ tamir etilüvi planlaştırıla.
Aluştanıñ Rusiye başlıqları, şeerni suvnen temin etmek içün yañı yerastı çoqraqlarnı qıdıralar. Bu sual bugün, yanvarnıñ 21-nde, Cemaat şurasınıñ toplaşuvında muzakere etildi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
