Qırımdaki «Altın beşik» mustaqil qırımtatar teatriniñ faaliyeti al-azırda bücetten maliye etilmeyip, qırımtatarlarnıñ bağışları sayesinde çalışa. Bu aqta «Altın beşik» teatriniñ qurucısı Bilâl Bilâlov Qırım.Aqiqat Radiosınıñ yayınında ayttı.
Onıñ bildirgenine köre, teatrge öz binası kerek, oyuncılar qırımtatar halqınıñ yardımına ümüt ete.
«Canköyde sanalaştırğan «Beş daqqa nefes» spektaklimiz içtimaiy ağlarda 10 biñ kere baqıldı. Halqımıznıñ bizge ihtiyacı bar, demek. Biz çalışamız, teatr – biznesimiz degil, avgust ayından berli bir kapik aqça almadıq. Bina qıdıramız, şimdi qurucılıq kete. Yañı teatrni qursaq, onıñ qurucılığında bücetten bir kapik sarf etilmeycek, tek qırımtatarlarnıñ bağışları ve yardımı sayesinde olacaq. Bizim içün bu eñ müimi», – dep tarif etti Bilâlov.
«Altın beşik» yañı mustaqil qırımtatar teatriniñ erkânına 20-ge yaqın qırımtatar oyuncısı kirmekte. Olar Qırımtatar muzıkalı-drama teatriniñ reberi Bilâl Bilâlov işten boşatılğan soñ andan ayırılğan edi.
Qırımnıñ Rusiye akimiyeti 2018 senesi yazda Qırımtatar muzıkalı-drama teatriniñ bediiy reberi ve rejissöri, Ukrainada nam qazanğan sanat erbabı Bilâl Bilâlovnı işten boşattı. Rejissörniñ fikirince, onı uydurılğan sebep boyunca işten boşattılar. O, Qırımnıñ Rusiye akimiyeti tarafından işten boşatılmasına itiraz bildire.
Bilâlov 1989 senesinden berli Qırımtatar akademik muzıkalı-drama teatrinde çalışqan edi, 1994 senesi onıñ bediiy reberi-müdiri oldı.
