İşğal etilgen Aqyarda daa altı yañı koronavirus hastası qayd etildi. Bu aqta şeerniñ Rusiye ükümeti toplaşuvında Aqyar valisi vazifelerini eda etken Mihail Razvojayev bildirdi, dep haber ete Qırım ve Aqyar kütleviy haber vastaları.
«Bugün birine daa altı tasdıqlanğan diagnoz qoşuldı. Böylece, bugün daa yedi hastamız bar. Dördü – dördünci şeer hastahanesiniñ kiçik tibbiyet hadimidir», – dep ayttı Razvojayev.
Onıñ bildirgenine köre, bütün hastalar endi hastahanege alındı, olarnıñ bağları ise teşkerildi.
Qırımda aprelniñ 30-nda daa üç yañı COVID-19 hastası qayd etildi. Aralarında ağırayaqlı qadın bar.
Böylece, Rusiye akimiyetiniñ malümatına köre, aprelniñ 30-nda Aqyarda 84 koronavirus hastası bar, Qırımda – 92.
Qırımda bir çoq müessise ve teşkilâtnıñ faaliyetini toqtatqan ve vatandaşlarnıñ özüni izolâtsiya etmesini belgilegen yüksek seviyeli azırlıq rejimi devam ete. Aqyarda bu rejim mayısnıñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
