Sıñırlav tedbirleri Seydamet Mustafayev, Remzi Nemetullayev, Seytumer Seytumerov, Amethan Ümerov, Ruslan Asanov ve Eldar Yakubovğa uzatıldı.
"Rusiye FSB-si, tahqiqat izolâtorında apis cezasını üç ayğa, 2024 senesi iyülniñ 22-ne qadar uzatmağa muracaat etti. Mudafaa ve mabüslerniñ özleri bu qabaatlavlarnıñ saçmalığını, olarnıñ gizlenmek, şaatlarğa tesir etmek mümkün olğanına dair delillerniñ iç bir vaqıt berilmegenini ayttı", – dep qayd etti uquq qoruyıcı.
Kurbedinovnıñ aytqanına köre, qararğa qarşı şikâyet bermek içün üç kün bar. Onıñ aytqanına köre, qabaatlanğan qırımtatarlar özüni ahlâqiy ceetten yahşı is eteler, amma tahqiqat izolâtorı şaraitlerinde sağlıqları kün-künden fenalaşa.
2023 senesi avgustnıñ 24-nde Qırımda Rusiye quvetçileri altı qırımtatarnı yaqaladı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Ümerov, Eldar Yakubov ve Abdulmecit Seytumerovnıñ evlerinde tintüvler keçirildi. Bundan soñ erkeklerni tuttılar.
Aynı künü Rusiye kontrolindeki Aqmescitniñ Kiyev rayon mahkemesi tutulğanlarnı apiske aldı. Olarnı Rusiye Federatsiyası Ceza kodeksiniñ 205.5 maddesiniñ birinci qısmına binaen terroristik teşkilâtnıñ faaliyetini teşkil etüvde ve böyle teşkilâtnıñ faaliyetinde iştirak etüvde şübeli sayalar. Söz Rusiyede yasaq etilgen "Hizb ut-Tahrir" teşkilâtı aqqında kete. Yanvar ayında altı faalniñ apis müddeti aprelniñ 22-ne qadar uzatıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
