Rusiye kontrolindeki Kiyev rayon mahkemesi «Qırım musulmanları davası»nıñ mabüsleri Remzi Nimetulayev, Eldar Yakubov, Amethan Umerov, Ruslan Asanov, Abdulmecit Seytumerov ve Seydamet Mustafayevniñ tevqif müddetini uzattırdı. "Qırım birdemligi"niñ haber etkeni kibi olar 2024 senesi aprelniñ 22-nece SİZO-da qalacaqlar.
Advokat Emil Kurbedinovnıñ sözlerine köre, mahkemede FSB hadimleri er vaqıt kibi şübeli şahıslar gizlene ve tahqikat ketişatına tesir ete bileceklerine atıf etken. Adliyeci bu sezler deliller ile desteklenmey dep iddia ete.
İmaye tarafı mahkeme qararını temytm etmek niyetinde.
Kurbedinov, dava figurantları ile eki aydan berli iç bir tahqiqat areketleri keçirilmegenini de qayd etti, amma buña baqmadan olar alâ daa SİZO-da tutulalar.
Avgustnıñ 24-nde Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi. Tutulğanlar Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Avgustnıñ 25-nde Rusiye kontrolindeki Aqmescitniñ Kiyev rayon mahkemesi tutulğanlarnı eki ayğa SİZOğa yolladı. Bu qarar alınğanda mahkeme binası ögünde oturışuvğa kelgen faaller kütleviy şekilde tutuldı. Umumen 23 kişi tutuldı, dep haber etildi, olarğa Rusiye ordusında askerlik celpnameleri berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
