Almaniya Tış işler naziri Heiko Maas Rusiyeniñ Qırım işğalini «qaçınılmaz uquq bozuvı» dep adlandırdı. Bu aqta Almaniya Tış işler nazirliginiñ matbuat hızmeti haber ete.
«Qaçınılmaz uquq bozuvı beş yıldan berli devam ete. Rusiye arbiy küçüni qullanıp, sıñırlarnı deñiştirmege tırıştı. Böyle areket etkenler işançnı boza ve barışıq şekilde yan-yanaşa yaşavnıñ esas qaidelerini şübhege oğrata», – dep aytıla Maasnıñ Twitterde derc etken beyanatında.
Bundan evel Çeh Cumhuriyeti Tış işler nazirligi Rusiye işğal etken Qırımnı Ukrainanıñ bir parçası olaraq saymağa devam etkenini bildirdi. Çeh Tış işler nazirligi Qırımnıñ askeriyleştirilüvini ve Rusiye tarafından yarımada yanında gemilerniñ serbest keçmesine mania yapılğanını takbih etti.
Çeh nazirligi Rusiyeni insan aqları saasında halqara şartlarğa uymasına ve «Oleg Sentsov ve qanunsız tutulğan diger Ukraina vatandaşlarını, hususan 2018 senesi noyabr ayında ukrain gemilerine kerçekleştirilgen ücüm vaqtında zapt etilgen deñizcilerni acele azat etmesine» çağıra.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
