Ukraina Nazirler şurası aprelniñ 22-nde «Memleket içinde köçip kelgenler içün mesken» leyhasınıñ yerine ketirilüvi çerçivesinde Almaniya ükümeti ile işbirligi añlaşmasını tasdıqladı.
Añlaşmağa köre, Almaniya Ukrainanıñ işğal etilgen Qırım ve Aqyarda, Donetsk ve Lugansk vilâyetleriniñ ayrı rayonlarında evlerini terk etmege mecbur olğan ukrainalılarnı evnen temin etmesi içün 25,5 mln euro berecek. Bu aqta Ukraina Reintegratsiya nazirliginiñ matbuat hızmeti bildire.
«Rusiye areketleri sebebinden Donetsk ve Lugansk vilâyetlerinde, Qırımda evlerini terk etmege mecbur olğan vatandaşlarımızğa qol tutmaq içün Ukraina bücetinde para belgilemek içün elimizden kelgenini yapmağa tırışamız. Diger nazirliklerde bücet masraflarınıñ «karantin» qısqartuvlarına baqmadan, sıñırlavlar neticesinde memleket içinde köçip kelgenlerge mesken almaq ve Rusiye Federatsiyasınıñ silâlı istilâsı sebebinden viran etilgen evlerini tazmin etmek içün 20 mln grn saqlap qaldıq», – dep qayd etti Ukraina baş naziriniñ muavini Oleksiy Reznıkov.
Daa evel Türkiye prezidenti Recep Tayyip Erdoğan Ukraina prezidenti Volodımır Zelenskıynen 500 qırımtatar qorantası içün mesken qurmağa añlaştı, dep bildirgen edi.
Daa soñra Türkiye eyyeti Qırımdan köçip kelgenler içün evler qurulacaq Herson ve Geniçeskte topraq damartılarını baqtı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
