Almaniya kantsleri Angela Merkel aprelniñ 15-nde memleketniñ koronavirus yuqunçı pandemiyası sebebinden başlağan izolâtsiya rejiminden çıquv planları aqqında bildirdi. Bu aqta Azatlıq Radiosı haber ete.
800 metr kârege qadar azıq olmağan tükânlar kerekli sanitar tedbirlerge riayet etmek şartınen işine yañıdan başlay bile.
Mektepler mayısnıñ 4-nden başlap yavaş-yavaş açılacaq: başta dersler mezun olacaq sınıflarda başlaycaq, soñra da orta ve başlanğıç sınıflarda. Almaniyada kütleviy tedbirler eñ az yaznıñ soñuna qadar yasaqlanacaq.
Akimiyet vaziyetni közete ve er eki afta kerek olsa strategiyasını tüzetecek.
Almaniya koronavirus yuqunçından eñ çoq zarar körgen devletlerden biri ola. Anda resmiy şekilde 133 000 hasta qayd etildi.
Tahminen 3500 kişi hastalıqtan vefat etti, bu raqam, hastalanğanlarnıñ sayısına baqılsa, İspaniya, İtaliya ya da Frenkistandan qat-qat azdır.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
