Qırımlılarğa «Hizb ut-Tahrir davası» boyunca çıqarılğan ve umumen 65 yıl azatlıqtan marum etilmelerini belgilegen ükümlerniñ «uquqiy devlette bir temeli yoq», dep bildirdi Almaniyanıñ Ukraina elçihanesi.
Elçihane, Rusiye quvetçileriniñ semetdeşlerine qoltutmaq içün kelgen qırımtatar faallerini mahkeme ögünde tutqanını da takbih etti.
«Rusiye Qırımda işğalci devlet olaraq mesüliyetni öz boynuna almalı, siyasiy mabüslerni azat etmeli ve qırımtatarlarnıñ sistematik taqibini toqtatmalı! Olarğa qoltutqan insanlarnıñ kütleviy şekilde apiske alınması mümkün degil», – dep aytıla müessise Twitter haberinde.
Rostov-na-Donu Cenübiy okrugınıñ arbiy mahkemesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
Advokatlar, ükümge qarşı istinaf şikâyetlerini berecek, dep bildirdi.
Ukrainanıñ Rostov-na-Donu konsulı Taras Malışevskiy, Ukraina tarafı bu ükümge lâyıq cevap berecek, dep ayttı.
Qırım sakinleri bu dava mabüslerine qoltutmaq içün fleşmob keçirdi ve dua yaptı, cuma künü Rostovdaki mahkeme binası ögünde onlarnen qırımlı toplaşıp, dava mabüslerini azat etmege çağırdı.
Rostov-na-Donu (Rusiye) Cenübiy okrugınıñ arbiy mahkemesinde Rusiye qabaatlavınıñ vekilleri oktâbrniñ 20-nde Bağçasaraydaki «Hizb ut-Tahrir davasınıñ» dört mabüsi içün 66 yıllıq apis cezasını talap etti.
Hatırlatamız, «Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
