Almaniyanıñ Birleşken Milletler Teşkilâtında daimiy missiyası, Rusiyeniñ yarımadanı ilhaq etmesinden altı yıl soñra Qırımda insan aqları bozuvlarınıñ devam etmesine kösterdi.
BMT Baş Assambleyasınıñ insan aqları Komitetiniñ Qırım ile bağlı quvetleştirligen qarar leyhasına rey berüvden soñra Almaniya tarafınıñ cevabı böyle oldı.
“Qanunsız ilhaqaqtan 6 yıldan ziyade Rusiye Ukraina topraqlarında ciddiy insan aqları bozuvlarını devam ete. Almaniya Ukrainanıñ topraq bütünligine qoltuta ve Rusiyeni tecavuznı toqtatmağa davet ete”, – yazıla missiyasnıñ Twitterdeki beyanatında.
Keçenlerde, BMT BA Üçünci komiteti Qırımda insan aqları bozuvlarını tenqit etken quvetleştirilgen qaranı maqul kördi.
BMT-da Ukraina daimiy temsilcisi Sergiy Kıslıtsâ, BMT BA 75-nci sessiyasına Ukraina işğal etilgen Qırım ile bağlı eñ azından eki qarar leyhasını teklif etmege planlaştırğanını bildirdi.
İyül ayında BMT insan aqları Yuqarı komissarı Mişel Baçelet Qırımda insan aqları vaziyeti aqqında maruzanı taqdim etip, yarımadada iskenceler ve söz serbestligi sıñırlavı devam etkenini bildirdi.
Rusiye Tış işler naziri Sergey Lavrov, işğal etilgen Qırımda insan aqları bozulğanına dair laflar uydurıla, dep bildirgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
