Rusiye prezidenti Vladimir Putin Qırımnıñ şimdiki yolbaşçısı Sergey Aksenovnı «Qırımdan almamaq» ricasına cevap berdi. Bunı Putinde Qırım müendislik-pedagogika universitetiniñ prezidenti Fevzi Yakubov rica etti, dep bildire Qırım kütleviy haber vastaları.
Yakubov şöyle dedi: «Endi yaşlı insanım. Qırımda Sergey Valeryeviçten evel 10 baş nazirni kördim. Mına ne aytacaq olam. Evelkisinden soñ kelgen er biri Qırım içün daa az çalışa edi. Aytacağım – Allah rizası içün Sergey Valeryeviçni bizden almañız. Qırımnı ise biz yaparmız», – dedi Yakubov Putinge Aqmescitte cemaatçılıq ile körüşüvinde.
Putin cevap berdi: «Allah rizası içün Qırımdan almaycaqmız».
Martnıñ 18-nde Rusiye prezidenti Vladimir Putin Aqyarğa keldi. O, işğal etilgen Qırımda Siemensturbinalı eki elektrostantsiyasınıñ işke başlamasını buyurdı. Videoda onıñnen beraber Tavriya issilik elektrostantsiyası ve Tamandaki «Port» alt stantsiyasınıñ mütehassısları bar edi.
Daa soñra Putin Aqmescitteki kontsertte sözge çıqıp, Qırım işğali vaqtında qırımlılarnıñ areketlerini Ekinci cian cenki başında Qızıl ordu askerleriniñ areketlerinen qıyasladı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
