Rusiye uquq qoruyıcıları işğal etilgen Qırımda anonim arizalar esasında sıq-sıq tintüv keçirip başladı. Bu aqta «Veciye Kaşka davasınıñ» mabüsi Bekir Degermenciniñ ömür arqadaşı Aliye Degermenci Qırım.Aqiqat mühbirine tarif etti.
«Qırımda anonim çaquvlar sebebinden tintüvler aqqında sıq-sıq eşitmege mümkün. Uquq qoruyıcılar Aqmescitten kelip, yerli politsiya hadimlerini tintüv keçirilmesine celp ete. İnsanlar bunı aydınlatmay, cemaat da diqqat etmey. Noyabrden dekabr ayına qadar bunıñ kibi yedi tintüv aqqında bilem», – dedi Aliye Degermenci.
Aliye Degermenci tintüv keçirilmesinen bağlı tafsilâtlarnı paylaşmadı.
Bundan evel Kreml kontrolindeki Qırım Yuqarı mahkemesi «Veciye Kaşka davasınıñ» mabüsi Bekir Degermenciniñ apiste qaluv müddetini uzatmasına qarşı itiraz arizasını red etip, onı apiste qaldırdı.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
İşbu dava iştirakçileriniñ sağlıq problemleri bar. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
