Link açıqlığı

Dilâver Osman

Meclisniñ tış alâqalar idaresiniñ reberi Ali Hamzin, Rusiye Federal Hafvsızlıq Hızmeti tarafından Bağçasaraydaki evinde tintüvler aqqında tavsilâtlıca ikâye etti.

– Ali bey, eviñizde tintüvler ötkerilgen soñ, işleriñiz nasıl kete? Sizge bir de bir qabaatlavlar seslendirildimi ya da qabaatıñıznı tasdiqlağan deliller bildirildimi?


– Birinciden, tintüv aqqında vesiqa kösterilgende, bir qaç hata yüz berdi. Olar yanlarına mahsus adamlarnı almadılar. Bu ise, Rusiye qanunlarınıñ bozuluvıdır. Kösterilgen vesiqada, Ali Hamzin terroristik teşkilâtlarnen bağ tutqanında şeklengeni yazılğan edi. Episi olıp 14 adam keldi, olar bütün evni 2 saat içinde tintip çıqtılar.

Bir şey taptılarmı?

– Yoq. Qıdırğan patlayıcı maddeler, silâ, yasaqlanğan kitaplarnı tapmadılar. Bunı, Aqmescitteki FHH-nde bulunğan protokolında qayd etildi. Tintüv keçirilgende men Kiyevde edim, protokolda men imza çekmedim. Bundan soñra, Mecliste maña FHH-ke sorav kelmek içün davetname berdiler. Mayıs 22 künü men soravğa bardım, soravda umumiy sualler berdiler.

Neni soradılar?

– Olar terroristik faaliyetinde şeklegen ve atta yapqanında qabaatlağan şahıslarda menim vizitkamnı tapqanları meraqlandıra edi.

Bu şahıslar Qırımda ya da ondan tış bulunalar?

– Olar endi Moskvada bulunalar ve olarğa qarşı mahkeme işi açılacaq. Olar, menim vizitkamnı tapıp, olarnıñ qoluna nasıl etip tüşkenini soradılar.

Mühbirler degilmi?

– Men tekmil aytıp olamam.

Sizni endi şeklemeyler?

– Men bunı aytmaz edim. Menim ziyaret varaqam em Leh Valensa, em Aleksandr Kvasnevskiyniñ qolunda bar. Fevral-mart aylarında menden bir çoq varaqa alınğan edi, şimdi de intervyü devamında, belki olardan birisine men varaqamnı berdim.

Bunıñnen sizge qarşı iş qapatılamı ya da yoq?

– Yoq, men bellesem, bu bir basamaqtır.

Maqsadları ne?

– Malümatnı teşkerüv, kibi añlam bar. Olar varaqamnı taptılar ve olarğa tüşken yollarnı ögrendiler. Men añlattım, er türlü yollarnen qollarına tüşe bile edi, belki özüm berdim. Amma, Meclis ile bağlı faaliyetim de bar.

Bu kibi tintüv Meclisniñ sabıq reisi Mustafa Cemilevniñ evinde de ötkerildi. Bu tesadüfiy bir almı?

– Menim evimde tintüv keçirilmezden bir kün evel, Mustafa Cemilevniñ evinde tintüv ötkerildi. Men endi aytqan edim, bunı basqı kibi tanıyım. Varaqa boyunca tintüvni eki KAMAZ tolu silâlı «Berkut» hadimleri, olardan ğayrı daa 14 adam – bunıñ episi, bir yalıñız Meclis azası Ali Hamzinge qarşı basqı degil, umumen, Qurultay-Meclisniñ sıqıştıruvıdır.

Demek, siznen bağlı mesele açıq qalmaqta, ve siz tüşken vaziyet, Mecliske tesir etme ıntıluv kibi añlamaq mümkünmi?

– Ebet, bu birinci adımlar.
XS
SM
MD
LG