Sentâbrniñ 14-nde aqşam Rusiye polisiniñ hadimleri Sizikovnı evinden alıp, belli olmağan yerge alıp ketti. Sentâbrniñ 13-nde ise Vlasihadaki istinaf mahkemesi onıñ 17 yıl apis cezasını tasdıqladı.
Sizikov bağlanıp olğan uquqçı Lilâ Gemeciniñ aytqanına köre, polis hadimleri anasına istinaf mahkemesiniñ qararını köstermeyip, «ellerinde böyle bir qarar yoq», dep bildirgenler. Olar Sizikovğa qarşı küç qullanıp, «polis hadimleriniñ qanuniy talaplarına riayet etmegeni» içün mesüliyetke çekecekler, dep qorquzğanlar. Gemeci polis hadimleriniñ areketlerini qanunsız dep adlandırdı.
«Şimdi olğanlar İç işler nazirligi hadimleri yapqan zulum ola», – dep qoştı uquqçı.
Bundan evel Rusiye uquq qoruyıcıları belli olmağan yerge alıp ketken Sizikovnı Aqmescitteki iç bir tahqiqat izolâtorında tapamaylar, dep haber etildi.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
