Rusiye uquq qoruyıcıları soqur olğanından I derece saqatlığı olğan «qırımlı musulmanlar davasınıñ» mabüsi Aleksandr Sizikovnı belli olmağan tarafqa alıp ketti. Bu aqta «Qırım birdemligi» uquqçı Lilâ Gemeciniñ malümatına esaslanıp yaza.
2020 senesinden berli qırımlı ev apsinde tutuldı, amma tünevin Rusiye mahkemesi 17 yıl apis cezasını tasdıqladı.
«Şimdi Aleksandr Sizikov ve anası telefon ettiler. İç işler nazirliginiñ hadimleri mahkeme ükmüni yerine ketirmek içün keldi, dep haber etildi. Anasınıñ Vlasihadaki istinaf arbiy mahkemesiniñ müürli qararını köstermek ricasına böyle qarar olarda yoq, dep aytqanlar», – dep bildirdi Gemeci.
Uquqçı polis hadimleriniñ areketlerini qanunsız dep adlandırdı. Berilgen malümatqa köre, olar Sizikovğa qarşı küç qullanıp, «polis hadimleriniñ talaplarına riayet etmegeni içün» mesüliyetke çekerler, dep qorquzğanlar.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
