«Qırım musulmanları davasınıñ» mabüsi, I derece körüv saqatlığı olğan Aleksandr Sizikovnı işğal etilgen Qırımdan alıp ketkenler. Bundan evel o, üç ay devamında Aqmescitteki SİZO-1-de bulundı, dep haber ete «Gratı» İnsan aqları merkezi.
«Belli bir vaqıt Krasnodar SİZOsında olacaq, soñra «qapalı» apishanelerden birine alıp ketecekler. Ükümge köre, Sizikov birinci dört yılnı eñ sert apishane şaraitlerinde keçirmek kerek. Rusiye Federatsiyasında bu tarzda yedi müessise bar: Vladimir, Yelets, Verhneuralsk, Balaşev, Dimitrovgrad, Minusinsk ve Yeniseysk şeerlerinde», – dep aytıla haberde.
Etapnıñ soñki yerini qırımlınıñ qorantasına aytmadılar.
«Gratı» yazğanına köre, Sizikovnıñ advokatı ceza çekmesi içün mania olğan ve Rusiye Federatsiyasınıñ ükümeti tarafından daa 2004 senesi belgilengen bir sıra hastalığı bar dep, Rusiye koloniyasına avuştırılmasını toqtatmağa rica etken edi.
Sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ 17 yıllıq ükmüni deñiştirmedi. Ertesi künü işğalci uquq qoruyıcılar Aleksandrnı apiske aldı. Sentâbrniñ 14-nde aqşam Sizikovnı evinden alıp, Bağçasaraydaki izolâtorğa alıp ketkenler, eşyalarını azırlamağa ruhset bermediler, dep bildirdi anası Yelena. Aleksandr kamerada bir özü edi. Aleksandrnıñ advokatı kör Sizikov tuta-tuta areket ete ve tek eki künden soñ unitaz ve rakovina olğan yerge yol tapıp olğanını aytqan edi. Sentâbrniñ 19-ı gecesi onı Aqmescit şeerindeki SİZO-1-ge avuştırdılar.
Aq qorçalayıcılar qayd etkenine köre, Rusiye qanunlarına köre, bütünley körüv qabiliyetini coyğan insanlar tüzetüv müessiselerinde ceza müddetini keçirüvden azat etilmek kerekler. Lâkin Rusiye mahkemesi Aleksandr Sizikovnı cezasını tüzetüv müessisesinde keçire bilgen adam olaraq tanıdı, Aqmescitteki Rusiye SİZO-1-niñ tibbiy hadimleri onıñ bütün hastalıqları aqqında vesiqasını qabul etmeyip, eski olğanını aytqanlar. Tibbiy bölük Sizikovnıñ tibbiy teşkerüvini özleri keçirecekler, dep bildirdi.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
