«Qırımlı musulmanlar davasınıñ» mabüsi Aleksandr Sizikov Bağçasaray merkeziy rayon hastahanesiniñ nevrologik bölügine alındı. Bu aqta advokatı Safiye Şabanova «Qırım birdemligi» cemaat birleşmesine bildirdi.
Onıñ aytqanına köre, martnıñ 15-nde Sizikov alı yaramağanı içün mahkeme munaqaşalarında iştirak etip olamadı. Diñlevler martnıñ 27-ne qaldırıldı, lâkin sağlıq vaziyeti eyileşmedi.
«Sıcağı, tımavı, öksürigi bar edi. Yahşı olur dep, başqa künge qaldırğanlar. Lâkin bir afta devamında daa beter oldı, küçlü baş ağrıları bar. Acele yardım hastahanege alıp ketti», – dedi advokat. Onıñ aytqanına köre, Sizikovnıñ sağlıq problemleri 2008 senesi qapalı ağır qafa miy yarasından soñ başladı.
«Aleksandr betindeki siñirini üşütti dep tahmin ete, amma diagnoz daa yoq. Cuma künü teşkerüv yapıldı», – dep izaatladı Şabanova.
Uquqçı mabüsniñ hastahanede olğanına dair vesiqalar berdi, amma mahkeme bugün Sizikovnı diñlevlerge ketirtmege qarar berdi. Qararda Rusiye qadısı mabüsniñ hastahanede olmağanına dair haberi bar, dep ayttı.
«Alğan haberimizge köre, mahkemege bergen vesiqamızda bir şeyler qoşuldı – kim tarafından belli degil, amma Sizikov mahkeme oturışuvında iştirak ete bile dep aytıldı. Malümat alınğan soñ mahkememe 10 daqqağa mesleat odasına ketip, dava aprelniñ 18-nde saba saat 10-da baqılacaq, dep haber etti», – dep tarif etti advokat.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
