Krasnoyarsk ülkesindeki Rusiye mahkemesi «qırımlı musulmanlar davasınıñ» soqur mabüsi Aleksandr Sizikovnı azat etti. Bu aqta diger qırımlı mabüs Seyran Saliyevniñ ömür arqadaşı Mümine Saliyeva bildirdi.
«İlk 4 yılını apishanede keçirecek edi, qalğan 13 yılını – sert rejimli koloniyada. Sizikov azat etilgen soñ daa bir buçuq yılğa azatlığı sıñırlandı. 2020 senesinden berli o, ev apsinde edi, 2024 senesi sentâbr ayından başlap SİZOğa alındı. Şimdi o, azatlıqta. Ve bu bizim içün büyük quvanç», – dep yazdı o.
Jurnalist ve aq qorçalayıcı Lutfiye Zudiyeva bildirgenine köre, Sizikov başta Krasnoyarsktan Soçige baracaq, soñra – işğal etilgen Qırımğa.
«Oturışuv malümatı mahkemeniñ resmiy saytında evelden peyda oldı, amma dava tafsilâtları gizli edi. Advokatlarnıñ malümatına köre, laf 2020 senesi iyul ayında Qırımda tutulğan qırımlı siyasiy mabüs Aleksandr Sizikov aqqında kete edi. Mabüsniñ anası, Yelena Sizikova, haber etkenine köre, dava malümatı 2025 senesi aprelniñ 4-nde, oğlu Krasnoyarsk ülkesine hastahanege tibbiy teşkerüvler içün ketirilgen soñ, mahkemege keldi», – dep yazdı Zudiyeva.
Sizikovnıñ apiste bulunmasına mania olğan hastalıqlar cedvelinde olğan soqurlığı bar.
2020 senesi oraq ayınıñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi quralayda Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
