Qırımnıñ Bağçasaray rayonında tünevin keç aqşam saatlarında Rusiye uquq qoruyıcıları tintüv keçirdi ve “qırımlı musulmanlar davasınıñ” soqur mabüsi Aleksandr Sizikovnı alıp ketti.
Bu aqta “Qırım birdemligi” cemaat birleşmesine Aleksandrnıñ anası Yelena Sizikova bildirdi. Onıñ aytqanına köre, saat 23:00-lerde evine tahminen yigirmi kişi bir qaç avtobusnen keldi, tintüv oldı.
“Sürip kirgenler, Bağçasaray rayonındaki bir İç işler nazirliginiñ soraştırıcısınıñ qararını oquğanlar. Bir polis leytenantı Saşağa ariza yazğan eken. Onı alıp ketkenler. Toplap olğanlarımnı bir çantağa qoydım. Aşıqtırıp, yavaş azırlanamız dep açuvlana ediler”, – dep bildire Sizikovanıñ aytqanlarını “Qırım birdemligi”.
Haber etilgenine köre, tintüv vaqtında polis hadimleri eki bilgisayar ve Sizikovlar qorantasınıñ bütün cep telefonlarını alıp ketti. Sizikov qayda buluna aytılmay. Rusiye uquq qoruyıcıları vaziyetni resmiy şekilde izaatlamadı.
Oktâbrniñ 21-nde Rusiyedeki Krasnoyarsk ülke mahkemesi “qırımlı musulmanlar davasınıñ” soqur mabüsi Aleksandr Sizikovnıñ azat etilmesinen bağlı qararnı lâğu etip, onı Qırımdaki evinden apishanege qaytarmağa qarar çıqardı.
“Qırım birdemliginiñ” uquqçısı Nazim Şeyhmambetov haber etkenine köre, istinaf mahkemesi Rusiye prokuraturasınıñ muracaatını qanaatlendirdi. Böyle qararnı talap etken qabaatlav tarafınıñ delilleri belli degil, çünki Rusiyeniñ Krasnoyarsk ülkesinde tasdıqlanğan Sizikovnıñ soqurlığı koloniyada tutulmasına mania olğan hastalıqlar cedvelinde bar.
Hatırlatamız, bu yıl mayısta Krasnoyarsk ülkesiniñ Minusinsk şeer mahkemesi Sizikovnı soqur olğanından azat etti, o, Qırımğa qayttı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
