«Qırımlı musulmanlar davasınıñ» mabüsi, körüv qabiliyeti sebebinden I derece saqatı olğan Aleksandr Sizikov Qırımdan qomşu Rusiyeniñ Krasnoyarsk ülkesine tüzetüv müessisesine alıp ketirilgende yolda tutuv şaraitleri uyğun olmağanını şikâyet etti. Bu aqta «Qırım birdemligi» cemaat birleşmesi Sizikovnıñ advokatı Safiya Şabanovağa yazğan mektübi esasında bildirdi.
Berilgen malümatqa köre, yanvarniñ 14-nde Qazannıñ birinci ara stantsiyasında Sizikovnı tranzit noqtasına gecelemege çıqarğanlar. Anda, onıñ aytqanına köre, şaraitler uyğun degil edi. Lâkin İjevsk SİZosında daa beter oldı.
Sizikov neni uyğun körmegenini añlatmadı.
Nevbetteki şeer olğan Permde, qırımlınıñ aytqanına köre, o ve diger mabüsler tüzetüv müessisesine çıqarılmadı ve olar vagonda yuqlamağa mecbur oldılar. Yanvarniñ 19-nda mabüsler Yekaterinburgğa ketirildi.
«İgornen (Sizikovnen beraber Qırımdan ketken mabüs, dep qayd ete «Qırım birdemligi») bizni üçünci qatqa karantinge alğanlar. Kamerada tek ekimiz bar, mındaki şaraitler İjevskten daa beter. <…> Umumen er şey yahşı, sağlığı, ilâc ve aş yete. Tek bir şey bar – pek suvuq ve dımlı. Bütün urbalarımıznı üstümizge kiydik ve sıcaq çaynen qızamız», – dep yazdı Sizikov.
Yanvarniñ 21-nde onı Novosibirskke avuştıra bileler, dep qoştı. Etap olmasa, Sizikov ve başqa mabüslerni tek kelecek afta bu şeerge yollaycaqlar.
Dekabrniñ 10-nda Aleksandr Sizikov Qırımdan Krasnodar şeerindeki SİZOğa avuştırılğanı, ondan soñ Rusiye Federatsiyasında «qapalı» apishanelerniñ birine keçirilecekleri aqqında haber berildi. Qırımlınıñ qorantasına qayda ketirilecegi haber etilmegen edi.
Sentâbrniñ 13-nde Rusiyeniñ arbiy istinaf mahkemesi bu adamnıñ 17 yılğa apis cezasını belgilegen ükümni tasdıqladı. Ertesi künü işğalciler Aleksandrni tutqanlar. Sentâbrniñ 14-nde aqşam Sizikovnı evinden alıp, Bağçasaray muvaqqat izolâtorına alıp ketti, şeylerini bile cıymağa ruhset bermediler, dep bildirdi anası Yelena. Aleksandr kamera içinde bütünley yañğız edi. Bundan evel Aleksandrnıñ advokatı kör Sizikov toquna-toquna köçip yürgenini ve tek eki künden soñ ayaqyol ve yuvunaq qayda olğanını añlap olğanını ayttı. Sentâbrniñ 19-nda gece onı Aqmescit şeerindeki SİZO-1-ge avuştırdılar.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.