Memlekette akimiyetine qarşı kütleviy narazılıq aktsiyaları keçirilgen Beyazrusiye prezidenti Aleksandr Lukaşenkonıñ cuma künü bildirgenine köre, o, sağ ve çetelge ketmedi, dep bildire Azatlıq Radiosı.
Lukaşenkonıñ sözlerini BelTA resmiy agentligi bildire. Onıñ malümatına köre, Lukaşenko cuma künü qurucılıq saasınıñ inkişafınen bağlı toplaşuv keçirdi.
«Şimdilik sağım ve çetelde degilim, bazılarınıñ aytqanı kibi: Prezident memleketni terk etip, çetelde buluna. Bugün 14-ü, qurucılıq saasınıñ işini muzakere etmek içün körüşemiz», – dep ayttı Beyazrusiye prezidenti. O, avgustnıñ 10-ndan berli körünmedi ve çetelge ketkenine dair öşekler peyda oldı.
O, sanayı müessiseleriniñ hadimleri keçirgen narazılıq aktsiyalarını da izaatladı. Lukaşenkonıñ aytqanına köre, şimdi memlekette «emek kollektivleriniñ başını aylandıracaq olalar».
«İnsan çalışmağa istemese, onı arqannen ketirmeycekmiz de», – dep ayttı o, Lukaşenkoğa qarşı iş taşlav çağıruvları aqqında. Onıñ qayd etkenine köre, müessise işiniñ toqtatıluvı Beyazrusiyeniñ «istisalnı inkişaf ettirmeycegine» ve bazar küreşini yutturacağına ketirecek.
Narazılıq aktsiyalarını ve Beyazrusiye İç işler naziri bile tanığan uquq qoruyıcı organları hadimleri tarafından zorbalıqnı Lukaşenko izaatlamadı.
Merkeziy saylav komissiyasınıñ malümatına köre, Lukaşenko avgustnıñ 9-nde prezident saylavlarında ğalebe qazandı. Bu haber kütleviy narazılıq aktsiyalarınıñ sebebi oldı, olarnıñ iştirakçileri saylavlarnı sahte saya. Bu aktsiyalarnı militsiya sert bir şekilde dağıtıp başladı. Cumaaqşamı künü ise akimiyetniñ taktikası deñişti ve Minsk ve diger şeerlerdeki barışıq narazılıqlarına pek az keder ettiler.
Cuma künü Beyazrusiye şeerlerindeki narazılıq aktsiyaları devam ete.
Miting ve qısqa iş taşlavları «Grodno Azot», Minsk traktor zavodı, BMZ kibi büyük müessiselerde keçirile.
Narazılıq aktsiyalarına oca ve ekimler de çıqa. İnsanlar zorbalıqnı toqtatmağa ve yañı serbest saylavlarnı keçirmege talap ete.
