Qırımda patlayıcı madde ve silânı qanunsız saqlağanında qabaatlanğan qırımtatar faali Edem Bekirov Aqmescitteki Semaşko Cumhuriyet hastahanesiniñ endokrinologiya bölügine yatqızıldı. «Agora» halqara aq qorçalayıcı gruppasınıñ advokatı Aleksey Ladinniñ Qırım.Aqiqat mühbirine bildirgenine köre, Bekirovnıñ «alı yaramay, amma stabil».
«Bugün onı hastahanede ziyaret ettim. Alı yaramay, amma stabil. Qan basımı ve ayaq problemleri bar, ayağı tutula, bütün gece yuqlamağanını ayttı. Endokrinolog baqıp tedaviylevini belgilegen soñ şekeri stabilleşti», – dedi Ladin.
Advokatnıñ aytqanına köre, bugün Bekirovnı pulmonolog ve kardiolog baqacaqlar. Soñra umumiy tedaviylevi belgilenecek. İmayeci, yapılğan tibbiy teşkerüv Bekirovnıñ sıñırlav tedbirini ev apsine deñiştirmek içün itiraz etilmeycek sebeplerni aydınlatacaq, dep ümüt ete.
«Şimdi kardiolog ve pulmonolog baqmalı, soñra ekimler umumiy tedaviylev planını tizecekler. Sıñırlav tedbiri deñiştirilecegini bekleymiz. Sebep olmasa edi, onı SİZOdan çıqarmaz ediler», – dep añlattı Ladin.
Yanvarniñ 15-nde Bekirov Aqmescitteki Semaşko hastahanesine tibbiy teşkerüv yapılması içün alıp ketirildi.
Bekirovnıñ tuvğanları ayatı telükede olğanını bildirgen edi. Malüm ki, apiske alınğan faal şeker hastası ola. Ayağı kesilgen, muntazam sürette sarğılav yapılmalı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq.
Ukraina Tış işler nazirligi mahkemeniñ qararına qarşı «sert narazılıq» bildirdi.
