Rusiye advokatı Dmitriy Dinze Ukraina rejissöri Oleg Sentsovnı koloniyada cuma künü, oktâbrniñ 5-nde, ziyaret etecek ola.
Onıñ Qırım.Aqiqat mühbirine bildirgenine köre, Sentsovnıñ alı ket-kete fenalaşa ve «stabil yaramay» ola.
«Soñki kere kelgenimde (Sentsovnıñ – QA) oksigen yetmesizligi bar edi, çünki müçeleri ve qanına az oksigen kele. O, bir şey aşamay. Koloniya, elbette, alından pek qasevetlene», – dedi Dinze.
Onıñ aytqanına köre, koloniyada Sentsovnıñ alı fenalaşsa, onı zornen aşatacaqlar.
Sentâbrniñ 28-nde Sentsov «planlaştırılğan teşkerüv içün» şeer hastahanesine çıqarılğan edi. Neticede Rusiye ekimleri «tedaviylevini tüzetti», dep bildirdi Rusiyeniñ cezalarnı yerine ketirüv federal hızmeti.
Sentâbrniñ 11-nde Sentsovnıñ eki doğmuş qardaşı Natalya Kaplan rejissörniñ alı ket-kete fenalaşa, dep bildirgen edi Qırım.Aqiqatqa. Onıñ aytqanına köre, Sentsovnıñ qan sisteması «müim müçelerge oksigen taşımasını yapamay». Sentsovnıñ advokatı Dmitriy Dinzeniñ bildirgenine köre, açlıq tutqan rejissör töşekten zornen tura. Onıñ aytqanına köre, ukrainalınıñ sağlığına «büyük zarar ketirildi».
Oleg Sentsov mayısnıñ 14-nde Rusiye apishanelerinde yatqan bütün ukrainalı siyasiy mabüslerniñ azat etilmesi talabınen muddetsiz açlıq ilan etken edi.
Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.
