Rusiye, ordusı zapt etilgen Herson ve Zaporijjâ vilâyetlerinden Qırımğa ketirgen ukrayin zahiresini sata. Bunı Qırımnıñ Rusiye yolbaşçısı Sergey Aksönov bildirdi.
"Azat etilgen (işğa etligen - QA) topraqlardan zahire Qırım Cumhuriyetine tranzit olaraq kele, daa soñra satıluv içün Aqyarğa kete. Biz özümizni zahirenen temin etemiz", - dedi Aksönov "Krım 24" Rusiye telekanalına.
Ukrayina akimiyeti Rusiyeni işğal etilgen topraqlarda ukrayin zahiresini qanunsız elge keçirgeninde qabaatlay. Rusiye akimiyeti ukrayin zahiresini Rusiye ve işğal etilgen Qırımğa çıqarğanını taslıqlay.
Mayısnıñ 24-nde Ukrayin TİN yolbaşçısı Dmıtro Kuleba dünyanı Rusiyeden qırsızlanğan ukrayin zahiresini satın almamağa ve Rusiye cinayetçilerine ortaq olmamağa çağırğan edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
